دلوں میں الفتیں کم ہیں خلش زیادہ ہے

کلام: سحر محمود9 اکتوبر، 20262,118قارئین0 تبصرےمطالعے کا وقت: ۱ منٹ

فونٹ سائز:

واٹس ایپ پر شیئر کریں

فیس بک ایکس (X)

یہ تحریر سنئے

مطالعہ کا انداز:

فل اسکرین دیکھیں

گمانِ بد کی جہاں پرورش زیادہ ہے

حسد،غرور،انا،چپقلش زیادہ ہے

سزائے قتل سے بڑھ کر ہمارے مذہب میں

فساد کرنے پہ کچھ سرزنش زیادہ ہے

کسی کے سرد رویے سے سرد ہے موسم

کسی کے حسن کے صدقے تپش زیادہ ہے

تمام چہروں پہ پژمردگی نہیں یوں ہی

دلوں میں الفتیں کم ہیں خلش زیادہ ہے

پڑا ہے سابقہ ان سے کہ جن کی فطرت میں

فریب،مکر،دغا اور غش زیادہ ہے

یہ کس خیال نے بے چین کر دیا ہے انھیں

عیاں ہے چہرے سے دل مرتعش زیادہ ہے

کسی نظر میں محبت کی کچھ نہیں قیمت

سبھی سمجھتے ہیں زر میں کشش زیادہ ہے

جو جی حضوری میں رہتے ہیں صبح و شام ان پر

امیرِ شہر کی داد و دہش زیادہ ہے

میں کر و فر سے بہت دور ہوں سحر محمود

مرا مزاج حقیقت منش زیادہ ہے

اعلامیہ و ادارتی وضاحت: اس تحریر میں ظاہر کی گئی آراء اور بیانات مصنف کی ذاتی رائے ہیں، ادارہ ‘دی فری لانسر’ کا ان سے متفق ہونا ضروری نہیں ہے۔ کسی بھی تحریر کی اخلاقی و قانونی ذمہ داری خود مصنف پر عائد ہوتی ہے۔ مزید تفصیلات کے لیے ہمارا قانونی اعلامیہ و ٹیک ڈاؤن پالیسی ملاحظہ فرمائیں۔