وہی ہے دوست اپنا وقت پہ جو کام آجائے

کلام: فائز بلرامپوری15 دسمبر، 20221,851قارئین1 تبصرےمطالعے کا وقت: ۲ منٹ

فونٹ سائز:

واٹس ایپ پر شیئر کریں

فیس بک ایکس (X)

یہ تحریر سنئے

مطالعہ کا انداز:

سحر کی تیرگی ہو یا شبِ تاریک کے سائے

محبت! ہم تری آغوش میں آکر سکوں پائے

چلو اے ہم نواؤ! اب جفا کاروں کی بستی میں

دلِ مضطر پہ شائد واں کوئی احسان فرمائے

یہ بزمِ اہلِ الفت ہے، بہ رنگِ بے نیازانہ

جسے آنا ہو آئے جس کو جانا ہو چلا جائے

ترے دستِ ستم میں ایک لطفِ جاودانی ہے

تو کیوں تجھ سے بھلا کوئی بھی خواہشمند گھبرائے

ہمارا کیا، ہمیں تو بخت نے ویرانیاں بخشی

ترے دشتِ تمنا میں الہی ابر برسائے

بہت تنہائیاں ہیں محشرستانِ تصور میں

کوئی آواز ِ محرم اس بیاباں میں بھی آجائے

ابھی اے دوستو! یہ ساغر و جام و سبو رکھ دو

کہ جب تک کچھ ادب آدابِ میخانہ نہ آجائے

یہی تو مشغلہ ہے اہلِ دل کا ایک مدت سے

محبت کی، پھر اس کے بعد روئے اور پچھتائے

ازل ہی سے ملا ہے جذبہ آوارگی ہم کو

سو جس محفل میں پہنچے نغمہ فریادِ دل گائے

کسے اپنا کہیں اس بستئ ناآشنائی میں

وہی ہے دوست اپنا وقت پہ جو کام آجائے

حقیقت میں اسے کہتے ہیں واعظ دل کی دنیا میں

جو خود تڑپے، تڑپ کر اہلِ محفل کو بھی تڑپائے

وہ کہتے جاریے تھے داستانِ درد و غم فائز

بڑی مشکل سے ہم اپنی ادا پہ ضبط کر پائے

اعلامیہ و ادارتی وضاحت: اس تحریر میں ظاہر کی گئی آراء اور بیانات مصنف کی ذاتی رائے ہیں، ادارہ ‘دی فری لانسر’ کا ان سے متفق ہونا ضروری نہیں ہے۔ کسی بھی تحریر کی اخلاقی و قانونی ذمہ داری خود مصنف پر عائد ہوتی ہے۔ مزید تفصیلات کے لیے ہمارا قانونی اعلامیہ و ٹیک ڈاؤن پالیسی ملاحظہ فرمائیں۔

زمرہ:فائز بلرامپوری مشق سخن

اس مضمون کا علمی کوئز تیار کیا جا رہا ہے...

آفیشل واٹس ایپ چینل — The Freelancer Urdu