مولانا عبدالوحید رحمانیؔ رحمہ اللہ

کلام: شیخ صلاح الدین مقبول احمد مدنی9 فروری، 20211,498قارئین0 تبصرےمطالعے کا وقت: ۳ منٹ

فونٹ سائز:

واٹس ایپ پر شیئر کریں

فیس بک ایکس (X)

یہ تحریر سنئے

مطالعہ کا انداز:

استاذ گرامی شیخ الجامعہ مولانا عبدالوحید رحمانیؔ رحمہ اللہ

(۱۹۲۷-۱۹۹۷ء)

آشنائے لذت گفتار اپنی سامعہ

منتظر اب تک اسی لے کو ہے نفس طامعہ

آسمان ’’سلفیہ‘‘ کا تھا وہ شمس لامعہ

جامعہ باقی تو باقی نام ’’شیخ الجامعہ‘‘

خوش کلامیؔ، خوش مزاجیؔ، خوش لباسیؔ، خوش نویدؔ

ان عناصر سے بنا ہے حلیۂ عبدالوحیدؔ

ترجمانی درس میں ہوتی تھی ان کی صاف صاف

اس میں نہ تھا ذکر عنقا اور نہ ذکر کوہ قاف

تھے نہ استاذ گرامی عادی لاف و گزاف

گر کہیں رکتے تو کر لیتے تھے خود ہی اعتراف

ان میں حلم و بردباری بھی تعجب خیز تھی

گفتگو پر کیف بھی تھی اور تبسم ریز تھی

تھی زباں شائستہ و شستہ بہت تقریر میں

ان کو کچھ دقت نہیں تھی قوت تعبیر میں

تھا یہی ملکہ بھی ان کو قلت تحریر میں

ترجمانی عربیت کی تھی اسی تصویر میں

ہم نے دیکھا ہے حریریؔ کو وہاں پر چشم دید

وہ بنارسؔ میں حریریؔ کے تھے شاگرد رشید

خوش لباسی اور نفاست رب کی اک توفیق تھی

اس ادائے خاص میں ان کو بڑی تدقیق تھی

قابلِ تحسین بھی اور قابل تحقیق تھی

ان کی شخصیت مثالی اور نستعلیق تھی

جامعہؔ کو ان سے ملتا تھا لطافت کا پیام

بے تکلف تھی نفاست، پر رہا اس میں دوام

تھے مدرسؔ اور محررؔ اور خطیبؔ با کمال

تھا رویہ بے تکلف، بے ضرر اور بے مثال

ان کے حصے میں نہیں آئی تھی زیادہ قیل و قال

منصب عالی پہ تھے وہ آخری دم تک بحال

دفتری کاموں کا ہوتا تھا بہت کافی ہجوم

پر مقدم تھا صحت پہ مرکزی دارالعلوم

ساتھ طلبہ کے رویہ حق پناہی کا رہا

لطف و احسان و مروت، خیر خواہی کا رہا

اور حفاظت میں ہمیشہ اک سپاہی کا رہا

غیرت و احساس میں تو والا جاہی کا رہا

گویا وہ پیدا ہوئے تھے خیر خواہی کے لیے

مرکز علم وہنر کی حق پناہی کے لیے

خدمت ’’سلفیہ‘‘ میں کی وقف اپنی زندگی

والہانہ جامعہؔ سے تھی انھیں وابستگی

قابلِ تحسین تھی ماحول میں سنجیدگی

درحقیقت ہے اطاعت اور یہی ہے بندگی

خیر خواہانہ ہر اک اقدام ان کا یاد ہے

اس کے ذکر خیر میں لذت ہے اور دل شاد ہے

ڈھونڈھتی پھرتی مدارس میں ہے اب اپنی نگاہ

ہوگئے کم یاب ایسے حق پناہ و خیر خواہ

اب کہاں استاد و شاگردی کی رسم بے پناہ

اب فقیر بے نوا طالب تو وہ ہے والا جاہ

چل بسا دل بند تو اس کا بدل آتا نہیں

دن گذر جاتا ہے مصلحؔ کوئی کل آتا نہیں

مصلحؔ نوشہروی(۲۲؍۱۰؍۲۰۱۵ء، نئی دہلی)

اعلامیہ و ادارتی وضاحت: اس تحریر میں ظاہر کی گئی آراء اور بیانات مصنف کی ذاتی رائے ہیں، ادارہ ‘دی فری لانسر’ کا ان سے متفق ہونا ضروری نہیں ہے۔ کسی بھی تحریر کی اخلاقی و قانونی ذمہ داری خود مصنف پر عائد ہوتی ہے۔ مزید تفصیلات کے لیے ہمارا قانونی اعلامیہ و ٹیک ڈاؤن پالیسی ملاحظہ فرمائیں۔

زمرہ:مشق سخن شیخ صلاح الدین مقبول احمد مدنی

اس مضمون کا علمی کوئز تیار کیا جا رہا ہے...

آفیشل واٹس ایپ چینل — The Freelancer Urdu